Кыргызстанда электрондук акчаларды мурас катары калтыруу мүмкүнчүлүгү мыйзам жүзүндө бекитилди. Бул тууралуу президент Садыр Жапаровдун «Электрондук акчаларды мурастоо маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө» мыйзамга кол коюшу менен маалым болду.
Мурда электрондук акча каражаттарынын мурастоо тартиби мыйзамда так аныкталбагандыктан, ушул чөйрөдө укуктук боштук болгон. Жаңы мыйзам бул маселени жөнгө салып, электрондук капчыктарда сакталган каражаттарды башка мүлк сыяктуу эле мурас катары калтырууга жол ачат.
Мыйзамдын максаты
Кабыл алынган өзгөртүүлөр адамдардын электрондук акчаларды колдонуу практикасынын кеңейишине байланыштуу актуалдуу болуп калды. Мыйзам мураскорлордун укуктарын коргоого жана электрондук акча каражаттары боюнча укуктук аныктыкты камсыздоого багытталган.